ភ្នំពេញ៖ ព្រះមហាក្សត្រនៃព្រះរាជាណាចក្រកម្ពុជា សម្ដេចព្រះបរមនាថ នរោត្តម សីហមុនី បានអំពាវនាវដល់ជនរួមជាតិខ្មែរទាំងអស់រួមសាមគ្គីគ្នាដើម្បីកសាងមាតុភូមិកម្ពុជាឱ្យកាន់តែរីកចម្រើនថែមទៀត ស្របតាមគោលនយោបាយរបស់រាជរដ្ឋាភិបាល។

ព្រះរាជសារព្រះមហាក្សត្របានធ្វើឡើងក្នុងពិធីអបអរសាទរទិវាកំណើត៧០ឆ្នាំនៃកងយុទ្ធពលខេមរភូមិន្ទ ព្រឹកថ្ងៃព្រហស្បតិ៍ ទី៩ ខែវិច្ឆិកា ឆ្នាំ២០២៣នេះ នៅព្រះបរមរាជវាំងកម្ពុជា ដោយព្រះមហាក្សត្រ ព្រះបាទ នរោត្តម សីហមុនី បានព្រះរាជឱង្ការដោយបានដោយសរសើរការដឹកនាំរបស់នាយករដ្ឋមន្ត្រីថ្មី ដែលបានធ្វើឱ្យមានការប្រែប្រួលជាច្រើន និងបានរក្សានូវការដើរតាមមាគ៌ានយោបាយរបស់អតីតនាយករដ្ឋមន្ត្រី សម្ដេចតេជោ ហ៊ុន សែន បានយ៉ាងល្អដែលធ្វើឱ្យប្រទេសរក្សាបាននូវសុខសន្ដិភាព ឯកភាពជាតិ និងសុខដុមនៅក្នុងសង្គម ជាពិសេសបានធ្វើកិត្យានុភាពជាកាន់តែល្បីរន្ទឺលើឆាកអន្តរជាតិ។

ជាមួយគ្នានេះព្រះមហាក្សត្របានអំពាវនាវឱ្យប្រជាពលរដ្ឋគ្រប់រូបចូលរួមសាមគ្គីគ្នាដើម្បីកសាងជាតិជាបន្តទៀត។

ព្រះអង្គមានព្រះរាជឱង្ការថា៖ «ខ្ញុំសូមអំពាវនាវបងប្អូនប្រជាពលរដ្ឋកម្ពុជាគ្រប់មជ្ឈដ្ឋានសូមរួបរួមសាមគ្គីជាធ្លុងមួយក្រោមដំបូលរដ្ឋធម្មនុញ្ញដើម្បីចូលរួមចំណែកការពារ និងកសាងមាតុភូមិលើគ្រប់វិស័យ»។

ព្រះអង្គមានជំនឿថាកម្ពុជានៅតែមានសន្ដិភាព ស្ថិរភាព រស់ក្រោមដំបូលរដ្ឋធម្មនុញ្ញតែមួយនៃមហាសាមគ្គីជាតិ ព្រះពុទ្ធសាសនា និងព្រះមហាក្សត្រ កម្ពុជាពិតជាគ្មានសត្រូវណាមួយអាចរំលោភឈ្លានពានលើទឹកដីកម្ពុជាបាននោះទេ៕